રાજકોટનાં ભુપેન્દ્ર રોડ સ્વામિનારાયણ મંદિરમાં આજે મહિલાઓએ હોબાળો મચાવ્યા બાદ નવો ખુલ્લાસો થયો છે. વડતાલ સ્વામિનારાયણ મંદિરનાં સંત રાજકોટની મહિલાને વીડિયો કોલ અને ફેસબુકમાં મેસેજ કરતા હોવાના સ્ક્રિન શોટ સામે આવ્યા છે.

રાજકોટ ખાતેના વડતાલ સ્વામિનારાયણ મંદિરમાં રાકેશ પ્રસાદની ગાદી હોવાથી એજન્દ્ર પ્રસાદ જૂથની મહિલાઓએ હોબાળો મચાવ્યો હતો. આ હોબોળો મંદિર ખાતે શાકોત્સવ દરમિયાન થયો હતો. મહિલાઓએ આક્ષેપ કર્યો હતો કે સ્વામિનારાયણ મંદિરના સ્વામી ફેસબુકથી મહિલાને વીડિયો કોલ કરે છે. મહિલાઓએ મંદિર ખાતે “ખોટા સ્વામી ન જોઈએ”ના નારા સાથે હોબાળો મચાવ્યો હતો. જે બાદમાં પોલીસે મધ્યસ્થી કરતા મામલો શાંત પડ્યો હતો.

શું છે સમગ્ર ઘટનાનો આખો મામલો?

રાજકોટનાં ભૂપેન્દ્ર રોડ સ્વામિનારાયણ મંદિર વડતાલ મંદિર હસ્તક આવે છે. ત્યારે બુધવારે અજેન્દ્ર પ્રસાદનાં અનુયાયી મહિલાઓ હરીભક્તો મંદિરમાં દર્શન કરવા માટે પહોંચ્યા હતા. ત્યારે સ્વામિ દ્વારા મહિલાઓ સાથે અણછાજતું વર્તન સામે આવતા મહિલાઓએ હોબાળો મચાવ્યો હતો અને ખોટા સ્વામી ન જોઇનાં નારા લગાવ્યા હતા. બુધવારે સ્વામિનારાયણ મંદિરમાં શાકઉત્સવ યોજવામાં આવ્યો હતો એ દરમિયાન હોબાળો મચતા પોલીસે મધ્યસ્થિત થવું પડ્યું હતું. જોકે મહિલાઓનું કહેવું છે કે, ભુપેન્દ્ર રોડ મંદિરે દર્શન કરવા જતા રાકેશ પ્રસાદ સ્વામિનાં અનુયાયીઓ દ્વારા તેમને મંદિરમાંથી બહાર કાઢવા માટે અભદ્ર ભાષાનો ઉપયોગ કરવામાં આવ્યો હતો. એટલું જ નહિં સંતો મહિલાઓની સાથે બેસતા હોવાનો પણ ગંભીર આક્ષેપો લગાવ્યા હતા.

એક તરફ ગુજરાતમાં મહિલાઓ સુરક્ષીત ન હોવાનાં મુદ્દાઓ ઉઠી રહ્યા છે ત્યારે રાજકોટનાં સ્વામિનારાણય મંદિરમાં દર્શન કરવા જતી મહિલા હરીભક્તને વડતાલ સ્વામિનારાયણ મંદિરનાં સંત વિડીયો કોલ કર્યો હોવાનો આક્ષેપ લગાવ્યો હતો. ગત 5 નવેમ્બરનાં આ વિડીયો કોલ અને ત્યારબાદ મહિલાએ વિડીયો કોલ કરવાની ના પાડતા તેને સોરી લખીને સંત દ્વારા મેસેજ કરવામાં આવ્યો હોવાનાં સ્ક્રિન શોટ સામે આવ્યા છે. મહિલાનું કહેવું છે કે, સંતોને મહિલાઓ સાથે વાત કરવાની સ્વામિનારાયણ સંપ્રદાયમાં મંજૂરી હોતી નથી તેમ છતાં આવા સ્વામિ મહિલાઓને વિડ઼ીયો કોલ અને મેસેજ કરીને સંપ્રદાયનું નામ બદનામ કરી રહ્યા હોવાનો આક્ષેપ કર્યો હતો.

ભુપેન્દ્ર રોડ સ્વામિનારાયણ મંદિરનાં ગાદી પતિ તરીકે રાકેશ પ્રસાદ સ્વામી છે જ્યારે આ મંદિરમાં દર્શન કરવા આવતી અજેન્દ્ર પ્રસાદ સ્વામીનાં અનુયાયીઓ સાથે ખરાબ વર્તન થતું હોવાનું વર્ષો થી વિવાદ ચાલી રહ્યો છે. ત્યારે આજે મહિલાઓએ રાકેશ પ્રસાદ સ્વામીનાં સંત સામે ગંભીર આક્ષેપો લગાવ્યા છે. ત્યારે વડતાલ સ્વામિનારાયણ સંપ્રદાયનાં સંતોનાં ચારીત્ર સામે આંગળી ઉઠી છે ત્યારે હવે સંપ્રદાય સંતો અને મહિલાઓ વચ્ચેની મર્યાદાને લઇને કેવા પગલા લે છે તે જોવું મહત્વનું રહેશે.

મુકુંદસ્વામી અને સત્સંગી મહિલા સાથે શું વાતચીત થઈ?

મુકુંદસ્વામી : જય સ્વામિનારાયણ. (આટલો મેસેજ કર્યા બાદ મુકુંદસ્વામી સત્સંગી મહિલાને ફેસબુકથી વીડિયો કોલ કરે છે)
મહિલા : કોલ નહીં કરવા.
મુકુંદસ્વામી : સોરી…..સોરી….ભૂલથી લાગી ગયો, હવે નહીં લગાવું.
મહિલા : તમે સ્વામી છો? ક્યા મંદિરના?
મુકુંદસ્વામી : હા, વડતાલ, મારે કોઈ સાથે કશું લેવા દેવા નથી.
મહિલા : સ્વામી હોય તેને પહેલા ફેસબુકનો ઉપયોગ ન કરવાનો હોય, એ ખબર છે?
મુકુંદસ્વામી : મારો ભગવાન મને સૂવાડે છે, જગાડે છે.
મહિલા : ફેસબુક યૂઝ કરવું હતું તો સંસારમાં રહેવાય ને?
મુકુંદસ્વામી : તમારા બોલવાથી એવું લાગે છે તમે જૂના પક્ષના છો.
મહિલા : આ ફેસબુક તમને ન શોભે, સાધુ તો ભજનમાં શોભે.
મુકુંદસ્વામી : કઈ રીતે? મારા ફેસબુકમાંથી ઘણા લોકો મળ્યા, મારા કામ પણ થયા છે, એ લોકો મંદિરે જતા થયા તો એમાં ખોટું શું છે?
મહિલા : તમારે શું કામ હોય? તમારે તો ભજન કરવાના હોય.
મુકુંદસ્વામી : તમે મહારાષ્ટ્રમાં આવ્યા છો? તમે ગુજરાતનો સત્સંગ જુઓ છો ક્યારેક મહારાષ્ટ્રનો જુઓ તો ખબર પડે સત્સંગ કેમ થાય.
મહિલા : સત્સંગી જીવનમાં સાધુના નિયમ વાંચી લેજો.
મુકુંદસ્વામી : તું જો તો ખબર પડે કે સત્સંગ કેમ થાય.
મહિલા : તુકારો નહીં દેવાનો. સભ્યતાથી બોલો.
મુકુંદસ્વામી : સભ્યતા છે હજી, એટલે વાત કરીએ છીએ.
મહિલા : જે ફેસબુક યૂઝ કરતા હોય એને સ્વામિનારાયણના સાધુ જ ન કહેવાય.
મુકુંદસ્વામી : હા જી, તમે એક કામ કરશો? સારું થયું તમે મળ્યા, મહારાષ્ટ્રમાં જજો એકવાર ત્યાં સત્સંગ કેવો થાય જોજો. (મહિલાએ જવાબ ન આપતા સ્વામી બીજો મેસેજ કરે છે.)
મુકુંદસ્વામી : શું થયું? સોરી. બાય જય સ્વામિનારાયણ.
મહિલા : ફેસબુકમાં તો ન જોવાનું આવતું હોય.
મુકુંદસ્વામી : શું?

મહિલા : ફેસબુક ન યુઝ કરવાનું હોય સ્વામી. આવું બધું યૂઝ કરવું હોય તો ભગવા ઉતારી સંસારમાં રહો. આવું સ્વામી હોય તેને ન શોભે.
મુકુંદસ્વામી : પણ તમે કેમ આટલી ચિંતા કરો છો?
મહિલા : મહારાજ પણ દુઃખી થતા હશે કે મારા સાધુ આવા?
મુકુંદસ્વામી : એમ, મને તો કીધું પણ નહીં કે મને દુઃખ થાય છે, તમારા ઘરેથી શું કરે બેન?
મહિલા : સાધુને કોઈ બેન કે કોઈ હોય જ નહીં સમજો.
મુકુંદસ્વામી : તમારા ઘરેથી કોઈનો નંબર આપશોજી?
મહિલા : કેમ? નંબર શું કામ છે બોલો.
મુકુંદસ્વામી : કામ છે, નંબર આપો પછી.
મહિલા : આવા સાધુ નથી જોયા સ્વામિનારાયણ સંપ્રદાયમાં. જે ફેસબુક સહિત બધું યૂઝ કરતા હોય.
મુકુંદસ્વામી : તો કેવા જોઇયે? લૂંટવાવાળા, ખોટું બોલવાવાળા.
મહિલા : ભજન કરે, ભગવાન સિવાય એને બીજું કોઈ ન હોય એવા મારા સ્વામિનારાયણ ભગવાનના સાધુ હોય, નહીં કે આવા FB યુઝ કરે અને બહેનો સાથે વાતું કરે એવા.
મુકુંદસ્વામી : બહેનોએ પહેલા ચાલુ કર્યું. ઓકે, બાય, જય સ્વામિનારાયણ.
મહિલા : શું બહેનોએ ચાલુ કર્યું હે?
મુકુંદસ્વામી : સોરી, બાય.

મહિલા : સ્વામિનારાયણ સંપ્રદાયમાં તો બહેનોનો ફોટો જોવાય તોય ઉપવાસ કરવો પડે, ને તમે તો અમારા પિક્ચર્સ જોવો છો હે. શરમ કરો હવે.
મુકુંદસ્વામી : તમે બહુ કર્યું હવે. માફ કરો.
મહિલા : મારા પિક્સ કેમ લીધા? બોલો તો પેલા.
મુકુંદસ્વામી : એક વાત પૂછું, તમને બતાવવા.
મહિલા : કોઈના પિક્સ લેવાનો કોઈને અધિકાર નથી.
મુકુંદસ્વામી : ક્યા પક્ષમાં છો તમે?
મહિલા : હું કોઈ પક્ષમાં નથી. હું ગુરુકુળ પણ જાઉ છું.
મુકુંદસ્વામી : તમે કીધું નહીં. ક્યા ગુરુકુળમાં જાવ છો?
મહિલા : હવે તમારે જવાબ જોઈએ છે ને? હું એવો જવાબ આપીશ કે સંપ્રદાય યાદ કરશે.