રમેશ ભગતે મિટિંગ શરૂ થતાં પહેલાં ચેરમેનને અરજી આપવાનો પ્રયાસ કર્યો હતો

• બેઠકમાં દેવ પક્ષના 4 અને આચાર્ય પક્ષના 3 મળી કુલ 7 સભ્યો હાજર રહ્યા હતા
• અરજી ન સ્વીકારાતા આચાર્ય પક્ષના 3 ટ્રસ્ટીઓ પ્રોસીડિંગમાં સહી કર્યા વગર નીકળી ગયા
• બેઠકમાં મંદિરના વિકાસને લઈ ચર્ચા કરવામાં આવી

ભાવનગર ચેરિટી કમિશનર દ્વારા દેવ પક્ષને બેઠક બોલાવવા માટે મંજૂરી આપવામાં આવતા ગઢડા ગોપીનાથજી ટેમ્પલ બોર્ડની આજે બેઠક યોજાઈ હતી. બેઠકમાં દેવ પક્ષના 4 અને આચાર્ય પક્ષના 3 મળી કુલ 7 સભ્યો હાજર રહ્યા હતા. બેઠકમાં મંદિરના વિકાસને લઈ ચર્ચા કરવામાં આવી હતી. આચાર્ય પક્ષના તો રમેશ ભગતે મિટિંગ શરૂ થતાં પહેલાં ચેરમેનને અરજી આપવાનો પ્રયાસ કર્યો હતો. અરજી સ્વીકારવામાં ન આવતા આચાર્ય પક્ષના 3 ટ્રસ્ટીઓ પ્રોસીડિંગમાં સહી કર્યા વગર બહાર નિકળી ગયા હતા.

આજની બોલાવેલ બેઠકને અયોગ્યઃ રમેશ ભગત
બેઠક શરૂ થાય તે પહેલાં આચાર્ય પક્ષ રમેશ ભગત દ્વારા ચેરમેન હરિજીવન સ્વામી દ્વારા બોલાવવામાં આવેલ બેઠક યોગ્ય નથી તેવી અરજી આપતા જે અરજી હરિજીવન સ્વામી દ્વારા ન સ્વીકારતા આચાર્ય પક્ષના તમામ 3 ટ્રસ્ટીઓ બેઠક છોડી બહાર નીકળી ગયા હતા અને મીડિયા સમક્ષ પોતે ચેરમેન છુ તેવો દાવો કરી આજની બોલાવેલી બેઠકને અયોગ્ય ગણાવી હતી.

ચેરમેન પદનો દાવો ગેરકાયદેસરઃ હરિજીવન સ્વામી
બીજી તરફ ચેરમેન હરિજીવન સ્વામીએ આજની બેઠકમાં મંદિરના વિકાસને લઇ ચર્ચા કરાઈ હોવાનું જણાવ્યું હતું. તેમણે આચાર્ય પક્ષના રમેશ ભગતના નિવેદન મામલે નિવેદન આપ્યું હતું કે આચાર્ય પક્ષ જ નથી તેમના વડા આચાર્ય અજેન્દ્ર પ્રસાદને સત્સંગ મહાસભાએ પદ ભ્રષ્ટ કર્યા છે તેથી આચાર્ય નામે કોઈ પક્ષ જ નથી અને હાલના આચાર્ય રાકેશ પ્રસાદ હોય રમેશ ભગત દ્વારા કરવામાં આવતો વિરોધ એક સ્ટંટ છે. ચેરિટી કમિશનર દ્વારા જે હુકમ કરવામાં આવ્યો છે તે હુકમ જ સાબિત કરે છે કે ચેરમેન પદનો દાવો ગેરકાયદેસર છે.