તાજેતરમાં ગઢડા મુકામે ગોપીનાથજી દેવ મંદિર માં ચાલી રહેલા વિવાદ અનુસંધાને બોટાદ જિલ્લા ના ડી.વાય.એસ.પી. રાજદીપ નકુમ ના બેફામ વર્તન અને વાણી વિલાસ યુકત બેજવાબદારી ભર્યા શબ્દોચ્ચાર સ્પષ્ટ દર્શાવતો વીડિયો વાયરલ થયો છે. જે બાબતે બાર એસો.એ બેઠક યોજી ઠરાવ કરી હાઇકોર્ટમાં મોકલી જવાબદાર અધિકારી સામે પગલા લેવાની માગ કરી છે.
આ વીડિયોમાં જોવા મળતી વિગત અને વાણી વિલાસ દરમિયાન કાયદા અનુસાર વાત વર્તન કરવા જણાવતાં કાયદા સંદર્ભે ભૂંડા બોલી ગાળ બોલવામાં આવતી હોવા બાબત કાયદાના રખેવાળના બેફામ વાણી વિલાસથી ભારે ટીકા થઈ રહી છે. આ મુદ્દે ગઢડા બાર એસોસિયેશન તરફથી એક બેઠક યોજવામાં આવી હતી. આ બેઠક દરમિયાન મંદિર અને વિવાદને ધ્યાને નહી લેતા બંધારણ અને કાયદાની ઐસીતૈસી કરી સમગ્ર પોલીસ વિભાગનું માથું શરમથી ઝૂકી જાય તેવા જવાબદાર અધિકારીના બેજવાબદાર વાણી વિલાસને વખોડી કાઢવામાં આવ્યો હતો. તેમજ આ બાબતે કાયદાના અપમાનને સાંખી નહી લેવા અને જે કાયદાએ વિશાળ સત્તા આપી છે અને જેના આધાર ઉપરજ કૂદતા અધિકારીની શાન ઠેકાણે લાવવા માટે એક ઠરાવ કરી ગુજરાતની વડી અદાલત સમક્ષ મોકલી સોશિયલ મીડિયામાં વાયરલ વીડિયો મુદ્દે જવાબદાર અધિકારી સામે પગલા લેવા માંગણી કરવામાં આવી છે.
