મંદિરના ચેરમેન હરીજીવન સ્વામી અને કોઠારી લક્ષ્મીનારાયણ સ્વામી સામે આક્ષેપ કરાયો

• 28 વર્ષની મહિલાએ કહ્યું, દેવપક્ષ અને આચાર્ય પક્ષના રાજકારણમાં મને નિશાન બનાવી બદનામ કરી
• પોલીસ ફરિયાદ પણ નહીં નોંધતી હોવાનો મહિલાના વકીલનો આરોપ

વિવાદોમાં પંકાયેલા ગઢડા સ્વામિનારાયણ મંદિરમાં લઘુશંકા કરતી 28 વર્ષીય મહિલાનો વીડિયો વહેતો થતાં ભારે હોબાળો મચી ગયો છે. મંદિરના ચેરમેન હરિજીવન સ્વામી અને કોઠારી લક્ષ્મીનારાયણ સ્વામીએ આ વીડિયો વહેતો કર્યો હોવાનો મહિલાએ આક્ષેપ કર્યો છે. મહિલાએ ભારે આક્રોશ વ્યક્ત કરતા જણાવ્યું હતું કે, દેવ પક્ષ અને આચાર્ય પક્ષના રાજકારણ વચ્ચે કહેવાતા સંતે મર્યાદા નેવે મૂકી આ ફૂટેજ વહેતો કર્યો છે. આ લોકોએ સમાજમાં મને જીવવા જેવી રાખી નથી અને બદનામીના કારણે જીવનમાં કોઈ રસ રહ્યો નથી.

10 વર્ષથી સેવા કરે છે પીડિતા
પત્રકાર પરિષદમાં મહિલાએ કહ્યું હતું કે, હું છેલ્લાં 10 વર્ષથી ગઢડા સ્વામિનારાયણ મંદિરમાં સાંખ્યયોગી બહેનો સાથે રહી ભગવાન અને ત્યાગી બહેનોની સેવા કરું છું. લક્ષ્મી વાડીમાં આવેલાં મોટાબાના ઓટાવાળી સહિતની જગ્યાએ નાઇટ વિઝન સીસીટીવી કેમેરા મૂકવામાં આવ્યા છે. આ કેમેરાઓનુ ડીવીઆર મંદિરના ચેરમેન હરિજીવન સ્વામી અને કોઠારી લક્ષ્મીનારાયણ સ્વામીના કબજામાં છે.

વકીલે પોલીસ પર ફરિયાદ ન લેવાનો આરોપ લગાવ્યો
૨૩ ઓગસ્ટે રાત્રે વરસાદી વાતાવરણ હતું. રાત્રે ૧૦ વાગે મોટાબા મંદિરના સંકુલ બહાર આવેલા વાડ પાસે લઘુશંકા કરવા ગઈ હતી. જે ગોપીનાથજી દેવ મંદિર તરફથી મૂકવામાં આવેલા સીસીટીવી કેમેરામાં રેકોર્ડ થઈ હતી. કહેવાતા સંતો હરિજીવન સ્વામી અને કોઠારી લક્ષ્મીનારાયણ સ્વામીએ અન્ય સાગરિતોની મદદથી ક્લિપ બનાવી સોશિયલ મીડિયામાં વહેતી કરી હતી.’ આ અંગે એડવોકેટ બી.એમ. મંગુકિયાએ જણાવ્યું હતું કે, પોલીસ ફરિયાદ નોંધતી નથી. આથી મહિલા આયોગ, માનવ અધિકાર પંચ, ગૃહમંત્રી સહિત વિવિધ જગ્યાએ અરજી કરીશું.

પીડિત મહિલા અને સામાજિક કાર્યકર વચ્ચેની વાતચીત મહિલા: બેન હું અમરેલી જિલ્લામાંથી બોલું છું અને ગઢડા સ્વામિનારાયણ મંદિરે સેવા આપવા જઉં છું. આશાબેન: હા, બરાબર….ઓકે…. મહિલા: મંદિરમાં મોટીબાના ઓટલાનો પ્રશ્ન ચાલે છે, હું બહેનોને લેવા-મૂકવા જતી હતી. આશાબેન: હા બેન પણ થયું છે શું? મહિલા: 24 તારીખે રાત્રે હું બહેનોને મૂકવા ગઈ હતી, વરસાદ ચાલુ હતો, મોટાબા મંદિરની બહાર એક ગટર જેવું છે. ત્યાં હું બાથરૂમ કરવા બેઠી’તી. મંદિરવાળાએ ત્યાં સીસીટીવી કેમેરા મૂકેલા અને તેમાંથી મારો બાથરૂમ જતી હોય એવો વીડિયો બનાવી વાઇરલ કરી દીધો. આશાબેન: કોણે વાઇરલ કર્યો? તમે બાથરૂમ ગયા હતા એવો વીડિયો વાઇરલ કર્યો? મહિલા: હા, આ બધા સીસીટીવી કેમેરાનું હેન્ડલિંગ મંદિરના કોઠારી સ્વામી અને ચેરમેનના હાથમાં છે. આશાબેન: તમે પછી કોઠારી સ્વામીને ફરિયાદ કરી? ટ્રસ્ટીને વાત કરી? મહિલા: ના, બેન નથી કરી પણ મને તમારી ખબર કે તમે નારીશક્તિ અને સામાજિક કાર્યો કરો છો એટલે મેં પહેલા તમને ફોન કર્યો. સાધુને તો કોઈ સ્ત્રીનું મોં પણ ન જોવાતું હોય તો શું આ સંતો કેમેરા સામે ચોવીસ કલાક બેસી આવું જ જોતા અને કરતા હશે? આશાબેન: આ વીડિયો વાઇરલ ક્યાં થયો? તમારી પાસે કેવી રીતે આવ્યો? મહિલા: જાણીતાઓના ફોન આવવા લાગ્યા કે તારો વીડિયો વાઇરલ થયો છે ત્યારે ખબર પડી. આશાબેન: બરાબર. મહિલા: મને જો ન્યાય નહીં મળે તો મારે મરવાનો વારો આવશે, આશાબેન: ના ના મરવાનું શું કામ. તમને કોની ઉપર શંકા છે?

રાજકારણ અને સત્તાના કારણે આ ઘટના બની હોવાનો આક્ષેપ
ગઢડા સ્વામિનારાયણ મંદિરમાં મોટીબાનું મંદિર આવેલું છે જેમાં સાંખ્યયોગી મહિલાઓ રહે છે અને સેવા પૂજા કરે છે. સાંખ્યયોગી મહિલાએ આક્ષેપ કર્યો છેકે, ગઢડા મંદિર લાગણી સાથે જોડાયેલું છે. મોટી બાની સેવા કરું છું. 23 ઓગસ્ટના રોજ આ ઘટના બની હતી અને 25મીએ આ ફૂટેજ વાઇરલ કરવામાં આવ્યો છે. હું શૌચ કરવા ગઈ ત્યારે સીસીટીવી ફૂટેજમાં આખી ક્રિયા કેદ થઈ અને તેના ફૂટેજ વાઇરલ કરવામાં આવ્યા છે. રાજકારણ અને સત્તાના કારણે આ ઘટના બની હોવાનો આક્ષેપ કરવામાં આવ્યો છે. હાલમાં મારો વીડિયો સામે આવ્યો છે, અગાઉના વીડિયો પણ હોઈ શકે છે. સીસીટીવી ફુટેજનું કંટ્રોલ કોઠારી સ્વામી જોડે હોય છે.

સાંખ્યયોગી માનવ અધિકાર પંચ અને મહિલા આયોગમાં ફરિયાદ કરાશે
ગઢડા પોલીસમાં અરજી કરી હતી પરંતુ FIR લેવાઈ નથી. અધર્મી લોકો કે જેઓ આ કામ કરે તેમની સામે કાર્યવાહી થવી જોઈએ. કોઠારી અને અન્ય પાર્ષદ પરેશાન કરી રહ્યા છે. હરિજીવન સ્વામી, વિપુલ ભગત અને લક્ષ્મીનારાયણ સ્વામી પોલીસને બોલાવી અમને પરેશાન કરે છે. સરકારમાં બેઠેલા દેવ પક્ષના લોકો તેમને સાથ આપે છે. માનવ અધિકાર પંચ અને મહિલા આયોગમાં ફરિયાદ કરાશે. લીલીયા પોલીસ સ્ટેશનમાં આ મામલે અરજી કરવામાં આવી છે. આ ક્લિપ વાઇરલ કરવામાં આવી હતી અને તેમાં લખાણ પણ લખવામાં આવ્યું હતું કે “મોટીબા સ્મૃતિ મંદિર સામે આચાર્ય પક્ષની બહેનો સા.યો અને પાર્ષદનો જોવો આ વીડિયો બાથરૂમ જાય છે આમને દેવની શું પડી છે.