વડતાલ મંદિરમાં રહેતા સ્વામી આધારસ્વરૂપ ગામની જ એક પરિણીતાને લઇ જતાં રહ્યાં હોવાની અરજી કરવામાં આવી છે. જોકે, આધારસ્વરૂપ બાબતે મંદિર પણ અજાણ છે. કારણ કે તેઓ કોઇને કશુ કહ્યા સિવાય જતાં રહ્યાં હતાં. આ અંગે મંદિરના સત્તાવાળાઓ દ્વારા 15મીના જાણ કરવામાં આવી હતી. વડતાલમાં સ્વામિનારાયણ મંદિરના પાછળના ભાગમાં રહેતી પરિણીતાના 8મી ફેબ્રુઆરી 2021ના રોજ ગુમ થઇ ગઈ હતી.

યુવતીના પતિએ સ્વામી પર આક્ષેપ કર્યાં
આ અંગે તેના પતિએ ચકલાસી પોલીસ મથકે પરિણીતા ગુમ હોવાની ફરિયાદ આપતાં પોલીસે ગુમ થયાની જાણવા જોગ નોંધ લીધી હતી. દરમિયાન પરિણીતાના પતિએ પત્ની ગુમ થવા બાબતે જિલ્લા પોલીસ વડાને અરજી કરી સ્વામી આધારસ્વરૂપ પર આક્ષેપ કર્યો હતો અને તેઓ પત્નીને ઉઠાવી ગયાની રજુઆત કરી હતી. આ અરજીની હજુ સત્તાવાર તપાસ શરૂ થઈ નથી. આમ છતાં ચકલાસી પોલીસને 15મી ફેબ્રુઆરીના રોજ મંદિરના સત્તાવાળાઓ દ્વારા સ્વામી આધારસ્વરૂપ કોઇને કશુ કહ્યા સિવાય નીકળી ગયા હોવાની જાણ કરવામાં આવી હતી.

પોલીસે હાલ આ મામલે તપાસ શરૂ કરી
હાલ પોલીસે બન્નેની શોધખોળ હાથ ધરી છે. ઉલ્લેખનિય છે કે,વડતાલ મંદીરમાં ચૂંટણી ટાણે જ સ્વામી ગુમ થયાની સાથે પરિણીતાને લઇ ગયા હોવાના આક્ષેપ સાથેની અરજીના કારણે હરિભકતોમાં પણ ચર્ચાનો વિષય બન્યો છે. જોકે પોલીસ હાલમાં આ સંદર્ભે તપાસ હાથ ધરી રહી છે. જેમાં શુ બહાર આવે છે તેની પર સૌની મીટ મંડાઇ છે.